អាហ្សង់ទីន៖ ប្រទេសអាហ្សង់ទីនកាលពីថ្ងៃសុក្រកន្លងទៅ បានអនុម័តឱ្យប្រើប្រាស់នៅក្នុងលក្ខខណ្ឌបន្ទាន់នូវប្រភេទវ៉ាក់សាំង COVID-19 របស់ចិន ដែលអភិវឌ្ឍន៍ដោយក្រុមហ៊ុន Cansino Biologics Inc., ក្នុងគោលបំណងជំរុញកំណើនសេដ្ឋកិច្ចក្នុងប្រទេសឡើងវិញ តាមរយៈការផ្តល់វ៉ាក់សាំងដល់ប្រជាជនក្នុងប្រទេស ស្របពេលដែលប្រទេសនេះកំពុងប្រឈមនឹងរលកទីពីរនៃជំងឺរាតត្បាតសកលនេះ ដែលធ្វើអោយស្មុគស្មាញដល់ការស្តារឡើងវិញរបស់ខ្លួនពីវិបត្តិសេដ្ឋកិច្ចដ៏យូរអង្វែងកើតឡើងពីវីរុសកូវីដ-១៩។

ក្រសួងសុខាភិបាល បានប្រកាសក្នុងសេចក្តីថ្លែងការណ៍មួយថា អាហ្សង់ទីនបានចុះហត្ថលេខាលើកិច្ចព្រមព្រៀងមួយស្តីពីការដឹកជញ្ជូនវ៉ាក់សាំងចំនួន ៥,៤លានដូស ដោយភ្ជាប់នឹងលក្ខខណ្ឌនៃការដឹកជញ្ជូនអាស្រ័យលើបរិមាណដែលមាននៃវ៉ាក់សាំង។ 

បច្ចុប្បន្ននេះ អាហ្សង់ទីនដែលមានចំនួនប្រជាជនប្រមាណ ៤៥លាននាក់ កំពុងរាយការណ៍ករណីឆ្លងថ្មីកូវីដ-១៩ ច្រើនជាងគេបំផុតប្រចាំថ្ងៃ ក្នុងលំដាប់ទី៣ បន្ទាប់ពីប្រទេសឥណ្ឌា និងប្រេស៊ីល ខណៈទិន្នន័យពីសារព័ត៌មាន Reuters បានឱ្យដឹងថា ប្រទេសនៅក្នុងទ្វីបអាមេរិកខាងត្បូងមួយនេះ មានអ្នកស្លាប់ដោយសារកូវីដ-១៩ ប្រមាណជា ៨៥,០០០នាក់ និងអ្នកឆ្លងសរុបលើសពី ៤,១លានករណី។

កន្លងមក អាហ្សង់ទីនបានអនុម័តឱ្យមានការប្រើប្រាស់វ៉ាក់សាំងការពារកូវីដចំនួន ៣ប្រភេទរួចមកហើយដែលមានដូចជា វ៉ាក់សាំង Sputnik V របស់រុស្សី, Sinopharm របស់ចិន និងយន្តការ COVAX នូវប្រភេទវ៉ាក់សាំង AstraZeneca ខណៈប្រជាជនចំនួនជាង ១២,៦លាននាក់បានទទួលវ៉ាក់សាំងដូសទី១ ក្នុងនោះមានចំនួន ៣,២លាននាក់បានទទួលវ៉ាក់សាំងដូសទី២រួចរាល់ ដោយមួយរយៈចុងក្រោយនេះ ការផ្តល់វ៉ាក់សាំងទៅកាន់ប្រជាជនកាន់តែមានប្រសិទ្ធិភាព និងលឿនជាងមុន៕